「2019年東京仙台～閨蜜之旅---Day 2」
溫泉旅館＞藏王狐狸村＞東京
一早起身食完溫泉旅館嘅豐富早餐，先去仙台寄存行李，之後出發去白石藏王狐狸村，逢星期二五有接駁巴士去到 狐狸村，我哋去嗰日係星期六所以選擇搭的士 用咗4200yen/單程～
好開心上到山上面開始落微微的雪， 喺門口已經聽到你可愛嘅叫聲，入場費1000 Yen，之後職員會同大家講解，原來有好多嘢要注意，例如唔可以著花紋、唔可以帶長的飾物、 外套唔好有太長嘅繩、 唔好摸牠們、唔好踎低等等， 因為狐狸好好奇， 我最後都被狐狸差啲咬甩條裙?
入到去見到有啲狐狸喺籠入面嗰啲係bb， 之後去到一個地方可以超近距離接觸狐狸，仲可以買100yen一包的零食餵狐狸， 之後玩到唔捨得走呀，佢哋實在太可愛啦！ 每日仲有兩場抱抱狐狸體驗，分別於早上十一點及下午兩點，費用$200yen， 最後仲有精品店買手信，職員亦會代客人call的士，回程價錢一樣～
因為係狐狸村逗留時間長咗，趕唔到原定JR返去東京，最後返到東京已經好晏，決定取消夜晚嘅行程直接去民宿，由JR大久保站行去民宿有一段嘅距離， 放低行李之後再去附近買晚餐返民宿， 今次嘅民宿有啲失望，除咗路程比較遠之外，佢嘅暖氣去五到下層， 好彩閣樓瞓覺嘅地方好暖！
